《半程總結》干地在倫敦的第二個冬天

藍獅於 27/12/2017 發表 收藏文章
-請支持藍獅 Facebook專頁-
《原創文章 歡迎轉載 請列明出處 謝謝》

仲有幾日就迎接2018年既來臨,同時意味著英超賽程已經到達一半,哥迪奧拿所帶領既曼城在積分榜上遙遙領先,拋離第二位既曼聯多達12分,標誌著除非藍月亮在下半季連續多場失分,否則其它對手只能以「爭前四」作為今季聯賽目標;講番車路士,帶著上季英超冠軍既名譽黎到今季,整體表現可以話完全被曼城比下去。當然,季初一段小低谷,干地依加仍然身在其位可以話令不少藍軍球迷舒一口氣,暫且避開了奪冠後被「炒」的魔咒,但意大利人在今季有不少具爭議性既戰術安排同臨場調動令人不解,今集半程總結會為大家討論一下。


<<後防再一次支撐起全隊命脈>>
相比於上季奪冠陣容,正選人腳上作出了兩個重點替換,迪亞高哥斯達以及馬迪既離開,換黎莫拉達、巴卡約高、魯迪加、真禾特及薩柏哥斯達。先講後防線,基本上今季車路士後防既人手係近哩幾季黎講最完整最充裕,最大驚喜必定係回收番黎既基斯甸臣,睇到過去哩兩季外借到慕遜加柏既成果,近日亦取代受傷缺陣既大衛雷斯為正選。而魯迪加,略嫌干地比佢上陣既時間不足,始終德國人既用波及長傳能力不下於卡希爾,喺缺少雷斯既後場助攻下魯迪加能夠為球隊既戰術部署得以完整。至於後者近日有傳與干地鬧翻導致缺陣,但其實係大衛雷斯既膝蓋舊患一直都未傳癒,所以近日既「煲水新聞」都只係傳媒炒作,深信巴西人一月離隊既機會不大。以長遠之計,佢同卡希爾都必定係兩者只能活其一,要睇干地喺賽季結束後如何安排。


<<中場分工不清 仍需時間磨練>>
意大利人今季除左用番343陣式外,亦開始試行「老本行」352陣式,取決於因應對手而作出適當既戰術安排,好多時干地都喺強強對壘既時候使用352陣式,希望加強中場以控制比賽節奏,由於由雙中場變成三中場,前線亦由打邊路反擊變為多打中路突破,球員尚需時間熟練有關陣式,尤其係新加盟既巴卡約高,佢喺343伙拍簡迪作雙中場時問題不大,但明顯在352時顯得不習慣,與法比加斯分工不清晰。而真禾特被干地安排在中場參與進攻方面既工作較多,好多時喺後場搶到波後「飲水哥」都一支箭跑上前場,球隊之前既陣容上的確欠缺像真禾特哩種多面性類型既中場球員。

<<翼衛替補 形同虛設>>
翼衛方面,託賴馬高斯阿朗素尚未受到傷患困擾,經常有球迷話點解干地唔用多啲堅尼地,其實後者並唔係翼衛既適合人選,無論意識、技術抑或位置感,巴西人都係適宜做番邊路攻擊手,左翼衛哩個位置需要新替補真係講到口水都乾。至於右翼衛喺摩西斯早前傷出一段時間都睇得出,新加盟既薩柏哥斯達表現真係未如理想,連一啲基本既一對一帶波突破佢都未做到,雖然邊路出波係高質素過前者,但欠缺穩定以及其它方面都唔合格,真係仲需要啲時間鍛鍊好啲基本功至可以同摩西斯喺右翼位上爭一日之長短,可能會令球迷更加懷念選擇加盟利物浦要求「打中場」但被迫去左打翼既張伯倫。

<<進攻乏力 變化單調>>
去到最具爭議既攻擊線上面,巴舒亞伊被干地投閒置散,莫拉達一缺陣就會久攻不下,夏薩特無力回天等等問題永遠在和波或輸波時就會出現。先講巴舒亞伊,深信干地只要收購得到新前鋒,比利時人離隊亦只係時間問題,只係究竟以直接轉會還是外借身份離開,就取決於干地、球會以及球員本人三方既取態,比較想睇到既係能唔能夠喺離開前見到巴舒亞伊夾莫拉達同場打雙前鋒,哩個組合係喺今季仲未見到,但出現既機會只會愈黎愈少;莫拉達必定係球隊既頭號射手,尤其係喺佢缺陣下睇得出西班牙人既重要性喺度,佢既加盟一改車路士過往較為「獸性」既前鋒特質,風格上明顯不同。而干地另一選擇就係用無鋒陣,一同派出夏薩特、柏度以及韋利安上場作攻擊手,但顯然面對一啲全力守既球隊就會出現老鼠拉龜既情況,多次喺邊路唔理智地「斬叉燒」,但禁區內又缺乏擅頂之人,多番被球迷批評安排失當。

戰術上在缺少莫拉達後,無鋒陣的確係球隊在進攻上能夠發揮最大效用既安排,但背後最大既問題其實係車路士在前線欠缺一名擁有創造性及具突破力既球員,類近前車路士球員馬達果種一邊走動拉開空位一邊為隊友鋪橋搭路創造機會既類型,柏度同韋利安都只係單一利用反擊作重心既攻擊手,而只靠夏薩特一人絕對不夠,只要佢狀態不足或被對手針對性防守部署,就會使全隊攻力大打折扣。與此同時,球隊前線亦缺乏一名「禁區之狐」,意識上需要留待在禁區負責埋門一腳以及補射「執雞」既攻擊手,好多時對手龍門撲番個波出禁區後都無人跟進,浪費左唔少入球機會,要睇下球隊能唔能夠喺一月在攻擊位置上進行補強,否則因此而失分既場面只會在下半季繼續出現。而意大利主帥臨場換人過遲既老毛病並未有明顯改善,好多時即使在落後下都要去到七十多分鐘先作出首個換人調動,餘下時間能夠讓後備上陣球員發揮出既效果其實又有多大呢?

經過沉晚既比賽過後,車路士經已與第二位既曼聯收窄到淨番一分既距離,盡管干地以至球迷都已經沒有衛冕既希望,但球會全隊都依然為聯賽排名一同努力,好快就會重啟歐聯戰線,只求每場比賽全力以赴,令球迷睇到一場又一場好波..

Come On Chelsea...

文章最後更新時間 : 27/12/2017 12:45

《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/
標籤: 干地  車路士  
【Budweiser發光打氣杯 陪你嗌足六十四場!】

留言

會員
我要評論
請按此登錄後留言。未成為會員? 立即註冊
  • OhMyGirl_Arin
    OhMyGirl_Arin 於 27/12/2017 評論 NO. 1

    講真算係咁架啦 始終正選後備級數有別 冬季希望買多個前鋒加個中場啦

  • Yuk Keung Tsui
    Yuk Keung Tsui 於 27/12/2017 評論 NO. 2

    干地季初甘多傷兵都頂得住,仲要車仔內部政治鬥羸埋黑鬼總監艾文路,我直頭想寫過"服"字比干地 !!!!!

  • Penny Yiu
    Penny Yiu 於 27/12/2017 評論 NO. 3

    我認為卡希爾唔值得有正備

  • OhMyGirl_Arin
    OhMyGirl_Arin 於 27/12/2017 評論 NO. 4

    卡希爾真係叫係掛名隊長而已 以佢嘅實力根本就後備料又成日自爆 隊長應該係azp做更加適合

  • Lam Che Yan Pc
    Lam Che Yan Pc 於 27/12/2017 評論 NO. 5

    講真我覺得咁既人腳踢到宜家既成績已經好好,曼城咁買人法英超真係無乜邊隊可以同佢玩

  • Marjill
    Marjill 於 27/12/2017 評論 NO. 6

    其實干地真係算係咁。

  • Cheng Ho Lun
    Cheng Ho Lun 於 28/12/2017 評論 NO. 7

    一年前嘅紀錄已經比曼城破左,人哋仲繼續創造歷史,佢都算冇面

快捷鍵:←
快捷鍵:→