從旺角場出發,香港足球先生華杜斯重返匈牙利國家隊!

WeAreHongKong 於 19/05/2018 發表 收藏文章
球迷若有留意港超聯,一定知道傑志中場華杜斯加盟以來一直有「神級」表現,香港聯賽輝煌之時曾經試過邀請到世界盃級國腳球星加盟,前國腳更多不勝數,但今時今日要喺香港踢到重返國家隊,簡直猶如天馬行空,華杜斯偏偏做到。


32歲嘅華杜斯早前喺「2017/18香港足球明星選舉」上成為大贏家,取得「香港足球先生」、「球員之星」、「最受球迷喜愛球星」及「最佳中場」四個大獎,噚晚再收到好消息。佢所效力嘅傑志宣布,球會正式收到匈牙利足協通知,華杜斯入選國家隊22人初選名單,出戰下月6日及9日對白俄羅斯及澳洲嘅國際友誼賽。匈牙利國家隊將近嘅正式比賽係9月起舉行嘅UEFA歐洲國家聯賽,華杜斯如果有好表現,隨時能入選呢項大賽名單。


華杜斯曾經40次代表匈牙利國家隊,但2011年起就再冇入選。佢喺2017年加盟傑志,表現已相當出色,但今季傑志得以出戰亞冠分組賽,相信係華杜斯再一次進入國家隊主帥 Georges Leekens 「法眼」的關鍵。


另外,盛傳有機會離港發展嘅華杜斯,今次得到國家隊徵召,或許會增加佢離港決心,因為香港球隊來季將不能直接晉身亞冠分組賽,可能大大影響華杜斯國家隊前途。

圖片來源:傑志FB
loading

留言


請按此登錄後留言。未成為會員? 立即註冊
    快捷鍵:←
    快捷鍵:→