[會員投稿]藍黑殺手伊卡迪,國米不可缺失的支柱。 文字

要細數球壇頂級前鋒,大家會提及嘅通常都係C朗拿度、美斯、利雲杜夫斯基、哥斯達、阿古路、希古恩同卡雲尼等等。以成就而言,呢幾位前鋒可以話係站於世界嘅頂峰。但係接下來嘅一個世代,已經有幾位出後起之秀吸引大眾觸目,甚至將佢地同前面幾位神鋒作比較。而喺國際米蘭,隨住三冠王班底離開,似乎未做到「新人勝舊人」繼續征服歐洲,但球隊新任隊長伊卡迪算係成功接棒,更加成功征服意甲射手榜。

國:伊卡迪年紀輕輕已闖蕩歐洲。

年輕射手的成長之路

雖然伊卡迪係阿根庭出生,但六歲就搬咗去西班牙嘅卡那利群島居住,仲加入咗當地球隊維辛迪里奧(Vecindario)青年軍,6年總共入咗超過500球。年紀輕輕嘅伊卡迪已經成為當紅炸子雞,受歐洲列強青睞,最終加盟巴塞隆拿。伊卡迪隨即成為U17及後來U19嘅中鋒,但因為當時巴塞球隊崇尚控球嘅全能足球風格(tiki-taka),其與伊卡迪呢類傳統中鋒嘅簡單踢法大相逕庭,升上一隊嘅前路茫茫,所以佢喺17歲仔就選擇加盟意甲森多利亞。

年青人以外借身份加盟森多利亞,成為青年軍首席射手,季尾得到球隊買斷並喺翌年提升至一隊。2012-13年球季可以話係佢大放異彩嘅一年,喺「燈塔打吡」(derby della lanterna)射入意甲首球助球隊3比1大破熱拿亞。呢個球季伊卡迪上陣24場攻入10球2助攻,其中三度幫助森多利亞大破保方十指關更為人所樂道,後來更因不斷射破祖雲達斯而被譽為「祖記剋星」。年青嘅伊卡迪喺意甲聯賽得出咁高嘅效率,可以話係一張非常漂亮嘅成績表。

由於具備出色嘅表現與及無限嘅發展潛力,多隊歐洲豪門都向伊卡迪招手,而佢亦有透露過「銀河艦隊」嘅球探有同佢溝通過,但最後佢選擇咗國際米蘭,成為藍黑9號,背負起眾多傳奇神鋒嘅榮耀。

起初加盟國米獲得嘅機會唔多,頭一個球季只係獲得12場(1300分鐘)上陣時間,但係打入左9球。2014-15年球季,可以話係國米跌跌蕩蕩嘅一年,馬沙利嘅352經歷一輪沉寂,到文仙尼接任,陣式及踢法不斷換轉,352、4312、442、4231乜都試過,當然代價就係國米嘅成績。呢一段日子入面,唯一穩定嘅就係伊卡迪嘅效率。一個球季伊卡迪以33場22球6助攻於意甲射手榜奪帥,而佢嘅場均射門次數係3.4,佢將射門轉化為入球嘅能力係相當之強。接下來兩個球季佢都能夠保持高效,成為球隊必然正選、首席射手。

圖:現同時效力國際米蘭的兩位前鋒艾達和伊卡迪,曾於12/13球季共同效力森多利亞。艾達出生於巴西,20歲來到意大利加盟安玻里。2015年獲得時任意大利領隊干地賞識成為意大利歸化兵,艾達入選上年舉行的歐國杯,在分組賽中對瑞典射入絕殺球。伊卡迪擁有意大利、西班牙、阿根廷,三個國家隊的入選資格,伊卡迪卻一心爲阿根廷上陣,伊卡迪在2013年10月入選阿根廷國家隊參加世界杯分組賽,在烏拉圭一戰中後備上陣7分鐘,但自此之後就未再得到阿根廷國家隊的徵召。

全能前鋒的「蛻變」

「跑、停、控、射、入球」幾腳之內完成。簡單又直接嘅入球方程式係初期伊卡迪嘅風格。你要佢控多兩腳,扭波單挑對手?不了……當日嘅「禁區殺手」伊卡迪憑住射手觸覺、出色走位同活力,成為咗一部入球機器,亦因為踢法同入球效率高被譽為「新巴迪高」。每當佢想控多幾腳向前跑,幾腳之內就會被對手逼甩,當時你就會有呢個疑惑,究竟佢係咪巴塞產品?無錯,佢係巴塞產品,之不過係無巴塞味道嘅巴塞產品。呢種傳統中鋒(Poacher)如今可以話買少見少,因為現代足球對整體性大大提高,連基奧特同卡路爾都需要造波,純中鋒對球隊創造力同防守嘅貢獻不及全能前鋒,好多球隊對前鋒嘅工作同要求都改變咗唔少。話雖如此,高效入球率依然為伊卡迪說明佢嘅實力同作用。

2014-2015年中段國際米蘭由文仙尼接手,更改以往馬沙利嘅踢法,4312重返梅亞沙球場。唔單止陣式上改變,伊卡迪嘅角色亦都有調整。呢個球季開始能夠睇到伊卡迪會走邊線傳中、拉空位與及回後協助運球,控球技術都進步不少。自此伊卡迪開始走上一條新嘅道路。雖然伊卡迪於2015-16年新球季嘅入球數字下降,32場入16球4助攻,場均射門為1.7,但佢已經成為球隊不可或缺嘅重心,串連咗球隊中前場。今個球季(2016-17)再展現殺手霸氣,至今26場已經有20入球6助攻,其中國米主場對費倫天拿嘅賽事,伊卡迪一扭二再射破對手可以話係代表作。

圖:伊卡迪和麥斯盧比斯曾是好友,因為一個女人而鬧翻,在比賽前盧比斯拒絕與伊卡迪握手。

與國家隊仕途「掛勾」的場外生活

講起伊卡迪,非國米球迷會講佢嘅私生活多過佢球場表現。無辦法啦,佢背負起全世球男人最痛恨嘅罪名「勾義嫂」,必然會招來話柄。當年伊卡迪溝咗前隊友麥斯盧比斯(Maxi Lopez)當時嘅老婆雲達娜拉(Wanda Nara),結埋婚之餘仲湊埋佢個仔,直至依加佢哋嘅關係都一樣勢成水火。惹上如此場外是非,當然係引起熱話,甚至令好多人忘記佢球場表現,其中包括馬勒當拿。老馬對於伊卡迪可謂恨之入骨,「全盛時期」嘅馬勒當拿幾乎每個月鬧一次伊卡迪係反骨仔,背叛咗盧比斯,更指國家隊唔應該徵召佢。而盛傳阿根庭國家隊有好多球員都係盧比斯嘅老友,極力反對伊卡迪入隊,例如美斯同馬斯查蘭奴等。對於一個球員嚟講,為國效力應該係一種不可取代嘅榮耀同責任,而站於國米球迷立場,伊卡迪專注踢球會賽當然最好不過。

圖:上週意甲賽事國際米蘭7:1大勝阿特蘭大,班尼加以及伊卡迪同時上演帽子戲法,阿根廷足協Facebook 卻無視伊卡迪的存在。

隊長資格及對球會的忠誠。

伊卡迪同球會、球迷嘅關係都唔係話咁四平八穩。2014-15年球季成為意甲神射手,伊卡迪喺無數傳會緋聞之下同國際米蘭簽訂四年新合同,而國米隊長臂章係呢次續約嘅關鍵,亦都喺辛尼迪退役後,再次由阿根庭人接掌隊長臂章。雖然續約無耐,2015-16年球季後再次掀起伊卡迪嘅轉會傳聞。雲達娜拉係佢嘅妻子兼經理人,佢嘅言論都真係非常之「出位」,不斷提及伊卡迪有好多報價,包括係球隊死敵祖雲達斯。呢啲言論引起球迷極度不滿,雲達娜拉引來四方八面嘅抨擊。而蘇寧入主之下嘅國米,為咗穩定軍心、平息傳言,再次同伊卡迪續約,約期至2021年,更訂下1.1億歐元買斷價。呢一次續約有球迷感到不滿,同樣有外界指國米係對球員「屈服」,但事實在賣咗佢又能否搵到個如此高質嘅前鋒?我諗就難啲了。爭議聲不斷伊卡迪再次用表現擊敗所有質疑,繼續領軍國米。

而年僅24歲嘅伊卡迪喺去年(2016)年尾推出一本自傳Sempre Avanti (Always Forward),呢本書一出,可以話係將佢同球迷嘅關係推向低谷。書入面講述佢同雲達娜拉初次約會同爆發戀情,同時提及到佢喺2014-15球季作客對薩斯索羅敗陣後,伊卡迪向在場嘅國米小朋友球迷送出波衫,但極端球迷「北看台」組織(Curva Nord)球迷搶去波衫,再掟返比佢並高唱「可恥」。伊卡迪深感憤怒,喺自傳入面話自己喺罪案率高、經常發生命案嘅南美洲長大,揚言極端球迷會帶100個阿根庭罪犯將呢啲球迷殺死!呢一次真係公說公有理,球迷在意球隊表現,但係就缺乏對球員尊重。伊卡迪對球迷嘅言論令彼此關系撕裂,後來國米方面對伊卡迪罰款並要求刪去相關頁數,事件大致平息,但球迷組織發表聲明話尊重球會決定,但係永遠唔會承認伊卡迪為國米隊長。所以話伊卡迪征服意甲射手榜,但好似未能夠征服部份球迷嘅心。

圖:伊卡迪興國際米蘭球迷的關系也不是太愉快,除了場內不穩定的狀態,場外的花邊新聞,球迷也質疑他的隊長資格。

後生細仔已經經歷「傳奇」般嘅人生,更可以衝出歐洲為國米效力,成為意甲神射手。同漢丹諾域一樣,一次又一次將國米拯救,但無奈未能為國米奪得錦標,更加係一直無緣歐冠賽事,對於具備如此實力嘅球員嚟講絕對係相當可惜嘅事。但無論將來如何,「伊卡迪」呢個名字已經記喺國際米蘭嘅史冊入面,與辛尼迪、梅亞查、米列圖等眾星並列。究竟佢可唔可以擺脫世人對佢「勾義嫂」嘅印象,關於吓佢場上表現?拭目以待!

會員投稿:古亞連

讚好香港國米陣線專頁:
https://www.facebook.com/InterclubHK/posts/
意大利球會國際米蘭認可的官方球迷會
另外本會亦會定期舉辦球迷活動、踢球
歡迎加入一齊吹水,Forza Inter

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→