阿仙奴首席球探力撐舊同事「石內卜」接替雲加

隨著雲加宣佈於今季後離隊,阿仙奴新帥人選成為焦點話題,畢竟大部分球迷並冇見過唔係由雲加執教嘅阿仙奴,名氣較大嘅熱門人選,聽聞有艾歷尼、安歷基、安察洛堤等,有「阿仙奴血統」嘅有亨利、阿迪達同韋拉,不過最近傳出一個人選就頗令人意外。

利物浦助理領隊保域 (Zeljko Buvac) 近日突然暫時離隊,原因未明,紅軍只喺消息曝光後稱保域只係暫時因私人理由離開崗位。冇耐之後,就開始傳出保域將會係阿仙奴下任領隊人選之一,令球壇嘩然。


不過,個人認為熟悉阿仙奴嘅人應該唔會感到太意外,畢竟雲加執教阿仙奴之前教緊名古屋八鯨,上一位長期執教嘅功勳領隊佐治格拉咸,就來自米禾爾,阿仙奴總係喺領隊人選上予人驚喜。

喺《Sky Sports》節目《The Debate》上,前英格蘭中場梅菲 (Danny Murphy) 就直言,認為如果阿仙奴任命保域為領隊的話,係荒謬嘅選擇。的確,保域同雲加、佐治格拉咸唔同,佢係從未試過擔任正領隊 (曾經執教德國低組別球隊 Neukirchen 3年)。梅菲認為,雖然有首次執教就取得成功嘅例子,但要接受阿仙奴呢間大球會,就算係喺副領隊位置上經驗豐富、工作能力出眾,都難以勝任。

話雖如此,保域由緬恩斯時期已經擔任高普副手,一直合作至今長達17年,相信自有過人之處,高普亦曾認容佢係教練團嘅「大腦」。阿仙奴今季由多蒙特邀請過嚟嘅首席球探美斯連達 (Sven Mislintat) ,亦曾經同保域共事,《Sky Sports》報導,美斯連達力撐呢位貌似「石內卜教授」嘅舊同事接掌阿仙奴。美斯連達指出,阿仙奴喺「後雲加時期」,會將權力分成三份,分別由主教練、球探主管、足球關係主管 (Raul Sanllehi,Head of Football Relations,今季由巴塞加盟) 營運,相信保域加入後可以合作,幫助球會長遠發展。


Source: Sky Sports

留言


請按此登錄後留言。未成為會員? 立即註冊
    快捷鍵:←
    快捷鍵:→