初步簡評艾馬利正式上任,如挖舊部前西維爾中場屬必選推介

阿仙奴官方網站正式宣布,前巴黎聖日耳門主帥艾馬利(Unai Emery)出任新領隊。22年來首次更換領隊,各界自然充滿疑問,以艾馬利過往執教履歷,實在不敢樂觀,但仍希望佢為阿仙奴帶來一番新氣象。


歐霸三連霸、歐聯十六郎

艾馬利最為人稱道嘅功績,無疑係剛入主西維爾,2013-16三年之間就帶隊連奪三屆歐霸冠軍,但其實球隊三年喺聯賽分別得到第5、第5及第7位,未算突出,比起佢上任前連續兩季只得第9位稍有進步。去到PSG,佢嘅表現係令人失望,首先係上任第一季,本來衝擊法甲五連霸嘅PSG就失落聯賽冠軍俾摩納哥,另外更連續兩屆歐聯16強止步,2016-17歐聯16強領先4-0之下,次回合俾巴塞反勝6-1,總比數輸5-6出局;2017-18歐聯16強總比數2-5不敵皇馬出局。


當然,反過來若要為佢辯護,部分過錯亦可以解釋得到。連續兩屆歐聯16強止步,兩次遇上嘅對手係歐洲頂級班霸巴塞、皇馬,有不幸成分。不過其實PSG喺2016-17歐聯分組賽兩次賽和阿仙奴、被盧多格列斯逼和,導致屈居阿仙奴之後次名出線,亦難辭其咎。至於喺西維爾,球隊多次有核心球員如尼格度、拉傑迪等離隊,級數始終有限,聯賽未能更進一步亦勉強可以理解。

執教重細節可望改善球隊表現

艾馬利臨場調動反應方面,喺歐聯已見到不足之處,但佢始終有個人嘅長處。首先係佢處理更衣室關係能力唔差,去到PSG遇上球隊眾多「大佬級」人馬,得到足夠嘅尊重已經唔易,尼馬加盟後一度同卡雲尼為爭射12碼起爭執,有人認為咁樣反映艾馬利未能「壓場」,但個人持相反意見,認為艾馬利好快擺平事端,兩者之後冇再公開爭執,喺場上亦合作無間,係專業嘅表現,亦能反映出艾馬利有力處理隊中人事關係。

第二,艾馬利著重細節、擅長影片分析。根據《FourFourTwo》一篇分析文章,艾馬利可以從影片透徹分析敵我長短處,對每一個細節都不願錯過,前球員祖亞昆(Joaquín)曾透露艾馬利會喺備戰時俾一大堆影片佢睇。現今球壇教練越來越著重細節,雲加一直以來對於細節嘅疏漏正正係佢所謂「過時」嘅主要因素,亦係阿仙奴表現每況愈下嘅原因之一,艾馬利如果能為阿仙奴注入呢項新元素,其實已經係進步。


艾馬利愛舊部 —— 尼桑斯屬必然之選

睇返艾馬利往績,佢非常喜歡帶舊部去新球隊。西維爾時代,佢從舊主華倫西亞邀請班尼加及阿爾拉米加盟,PSG時期亦請來西維爾中場基祖華克。效果有好有壞,但如果佢仍然保持呢個習慣,個人極力推介一位選,就係近季亦有同阿仙奴傳「緋聞」嘅西維爾中場尼桑斯(Steven Nzonzi),多於任何一位PSG球星。


29歲法國中場尼桑斯2015-16球季由英超史篤城轉投西維爾,當時係艾馬利執教西維爾最後一季,尼桑斯喺史篤城擔任防守中場角色,腳下功夫略顯粗糙,不過近年喺西維爾表現大受好評,身高腳長又不失靈活,防守效率、幅蓋範圍依然不俗,同時改善咗傳送能力,更憑出色表現於2017年首次為法國隊上陣。


尼桑斯喺2018冬季轉會窗與阿仙奴拉上關係,個人一直認為十分合適,一來此子對於適應英超完全冇問題、年紀亦算當打;二來,阿仙奴最大短板一定要數中場防守能力不足,導致後防缺乏保護,沙加擅於長傳調度但防守意識不足,缺乏掃蕩型防中保護下表現欠佳,艾蘭尼防守力強但技術欠奉,而家嘅尼桑斯正正係阿仙奴中場嘅「拼圖」。

阿仙奴攻擊力問題不大,所以艾馬利能否取得成功,可否改善阿仙奴防守力係好大因素,如果能夠補充一名強力防守中場,已經成功咗一半。只於傳聞中嘅多蒙特中堅 Sokratis Papastathopoulos ,成事與否仍需觀望。

Source: Sky SportsFourFourTwo

留言


請按此登錄後留言。未成為會員? 立即註冊
    快捷鍵:←
    快捷鍵:→