一個whatsapp引發的絕交,我唔會再因為念及親情/友情而陪政府維穩!

一個whatsapp引發的絕交,我唔會再因為念及親情/友情而陪政府維穩!

足球,令你我成為摯友;政治,卻令你我形如陌路。

你係曼聯球迷,我係車路士球迷,認識咁多年,咪你寸我一句「金錢足球玩曬」,我寸返你一句「費格遜時間大曬」,大家咪喺吵吵鬧鬧中傾下波經、約出黎射幾球波,咁多年都冇話因此「反面」,琴晚你竟然同我絕交?

事緣我琴日打俾阿鋒,問下佢會否到場聲援學生同市民,點知次次都飛去留言信箱,眼見你whatsapp 在線,我咪send句野俾你:

我:「去唔去現場支持下?」

隔了幾分鐘,佢先覆我,個答案令我「O曬咀」⋯

鋒:「XXX,關我X事?你咪X再搵我。」

正當我輸入緊「使唔使咁燥⋯」幾個大字之際,眼見佢「九秒九」轉左whatsapp icon變成空白,到我send出之際,我已經feel到佢block左我,咁多年既友誼我唔想因為佢冇覆我而告終,於是我啟用封塵已久的SMS功能,問佢發生咩事,結果佢回我一句「我地唔再係朋友,係咁先」,正如一盤冷水兜頭淋落我度,成個人呆左,待到我回過神來,電視機前已經見到警察放緊催淚彈對付手無寸鐵的市民,個心當堂寒曬⋯

我唔明阿鋒點解同我「反面」,亦唔明白警察點解可以咁暴力去對待和平集會的市民,我淨係知道我要上街,因為我今日再唔行出去,我以後或者再冇機會行出去,我唔希望到我冇機會行出去個陣先黎後悔,於是我一路睇住新聞,一路睇住Facebook,最後夜晚12點幾到左旺角,人數越黎越多,車輛開始行唔到,原本我隻身到場,但好快已經同在場的朋友互相熟悉左,令我明白,有時候支持,唔一定要講到天花龍鳳,其實靜靜地坐喺度,已經支持緊大家,互相勉勵緊。

其實失去一個摯友,令我感受到友誼的脆弱,我個心好唔舒服,我只不過問佢去唔去,結果咁都可以「反面」,真係唏噓。我從來冇一意孤行去扭轉別人的政治立場,例如我屋企人好明顯就係支持民建聯同政府,認為「一亂不如一靜」,每次睇新聞都會聽到佢地冷嘲熱諷議論班示威人士,我何嘗唔想衝出房門反駁佢地的謬論?但我嘈贏場交,輸左頭家,抵唔抵?其實根本冇可能一時三刻可以扭轉到屋企人思維,正如佢地點「洗我腦」,我都唔會信「民建聯唔無恥」,定要我信「衣食住行,皆因民建聯成功爭取?」,坦白講,此時此刻,無論點做,我都尊重與我不同路的人,但願我冇干涉人,人地都唔好干涉我,我係為自己、為市民、為社會而選擇上街,絕對唔係好似某D組織慶祝國慶咁,送袋米、請食飯、送禮金等等形式「邀請」人上街而上街囉!

從我踏出家門一刻開始,我預左俾屋企人責罵,但「你有你鬧,我有我行」,我都做左咁多年「鍵盤戰士」,係時候放下手中的鍵盤,真真正正去落街爭取公義,畢竟我見到電視機前班警察幾咁暴力對待市民,如果我都可以無動於衷,然後蝸居喺屋企,咁我覺得我就真係愧對自己良心喇,直頭覺得自己唔係人!

琴晚返到屋企,本身以為我媽咪會一如既往責怪我,點知佢「粒聲冇出」就走去廚房,然後煮左碗麵俾我食,雖然碗麵係秉承佢一貫風格,麵「淋」肉「硬」唔好食,但我一邊食一邊獲得來自內心的取暖,縱使媽咪唔同意我的立場,但最後都係選擇了尊重我,而就係媽咪唔覺意的瞬間,我擰轉面,一股眼淚清脆地流下。

但願政治立場唔同,都莫把對方的意識形態全盤否定,「和唔不同」,請互相尊重。
標籤: 民主萬歲  

留言


請按此登錄後留言。未成為會員? 立即註冊
  • Song Bao 於 29/09/2014 評論 NO. 1

    香港人加油!

  • Stevengngng 於 30/09/2014 評論 NO. 2

    其實情況可以掉返轉

  • Thomson007 於 30/09/2014 評論 NO. 3

    加油!你要為你決定自豪

  • Gor SK 於 30/09/2014 評論 NO. 4

    去金鐘/中環啦,唔夠人

  • 愛華頓jj 於 30/09/2014 評論 NO. 5

    加油!!自己香港自己救!

  • Liew Wen Feiy 於 01/10/2014 評論 NO. 6

    加油 !马来西亚支持你们!!

  • kinyeah 於 01/10/2014 評論 NO. 7

    樓主講個位仁兄當然唔可叫做朋友,只可以叫做五毛

快捷鍵:←
快捷鍵:→